Seni Nulis Crita Cekak (Teori lan Praktik)

“Waton nulis kuwi gampang ananging nulis nganggo waton kuwi ora gampang” kira-kira kaya ngono kuwi gambarane menawa arep nulis crita cekak. Sing dimaksud ora gampang kuwi maksude crita-crita kang ditulis bisa kapacak ana ing ariwarti apadene kalawarti. Tulisan utawa crita kang bisa kapacak tegese wis dipilih lan pantes dipacak. Kajaba kuwi, tulisan kang dipilih temtu wis disunting utawa diedit dening editor.

Menawa dithinthingi, nulis crita kuwi ana senine lan ana tatacarane. Ing buku iki diandharake maneka teori, tatacara, lan tuladha crita-crita kang tau kapacak ana ing ariwarti lan kalawarti. Anane buku iki muga-muga bisa dadi sawijining referensi kanggo sinau babagan crita-crita basa Jawa kang amba tebane.

Kajaba kang Maha Kawasa, ora ana kang sampurna, kalebu tumetesing anjana kresna ing dlancang seta. Wusana, panyaruwe saka para pamaos tansah diantu-antu kanthi tinarbuka.