Abilawa

Lelakon mono adile kudu dilakoni. Menawa wis tumekaning pesthi, ndersula apa ora, kabeh bakal dumadi lan kudu dilakoni. Ana sesanti kang ngandharake apa-apa menawa digawe abot ya bakale abot senanjan kuwi sakjane perkara entheng, nanging suwalike perkara abot menawa dipikir entheng ya bakalae entheng. Kabeh-kabuh gumantung marang pikirane dhewe. Abot utawa entheng panandang kang disandhang, mesthi ana pituture.

Bab kaya ngono aku ya wis tahu nglakoni. Arep digawe entheng ya entheng, digawe abot ya bakal abot. Entheng lan abot kuwi cakramanggilingan, tegese bakal gumanti. Ora ana wong seneng bakale seneng terus, semono uga ora ana wong susah bakal susah terus jer wong-wong mau gelem ngowahi nasib utawa uripe. Aku ora bisa nyritakake utawa durung nemu tembung sing pas kanggo nyritakake kaya ngapa rasane nglakoni panandang kang daksandhang. Menawa mung tembung susah lan rekasa, dakkira kuwi durung satraju-satimbang karo maneka perkara kang daklakoni.