Madeg Pambiwara lan Gladhen Hamicara ing Pahargyan Penganten

Buku “Madeg Pambiwara lan Gladhen Hamicara ing Pahargyan Penganten” minangka wujud raos puji lan panuwun tumrap budaya lan kagunan Jawi mliginipun babagan Pambiwara lan Hamicara ing Pahargyan Penganten Gagrag Surakarta.
Buku punika ngrembag babagan caranipun Madeg Pambiwara punapadene Hamicara Pasrah Panampi lan Atur Pambageharja salebeting tatacara pahargyan penganten. Wiwit saking tatacara Lamaran, Parepatan Pamong/ Panitya Alit, Parepatan Kumbokarnan/ Rubukan/ Technical Meeting, Siraman, Midodareni, Ijab Paningkah, Pahargyan Panggihing Penganten, Pahargyan Ngundhuh Penganten, ngantos dumugi tatacara Pembubaran Panitya.
​Kanthi mbudidaya ngginakaken tembung-tembung ingkang prasaja, ringkes, mentes, lan teges satemah saged nggampilaken anggenipun nyinau lan gladhen madeg dados pambiwara lan hamicara ing rerangkening pahargyan penganten. Buku punika ugi ngemot babagan Ngrumpaka/ Panyandra salebeting tatacara ingkang tamtunipun wonten makna ingkang sinandi lan panyuwunan dhumateng Gusti Ingkang Murbeng Dumadi murih anggenipun penganten sakalihan lelumban aneng alaming bebrayan agung sageda manggih ing kawilujengan.
​Lumantar buku punika mugi sageda dados sarana nggampilaken sinau lan gegladhen anggenipun para pamaos sutresna budaya Jawi, sae punika Pambiwara, Dwija Basa Jawi, Pelajar/ Mahasiswa, lan sinten kemawon ingkang badhe nguri-uri lan ngurip-urip Budaya lan kagunan Jawi mliginipun Pambiwara lan Hamicara ing Pahargyan Penganten.